30.05.2016-Zëvendës ministri i MMPH-së, Ferat Shala së bashku me bashkëpunëtorë pritën në një takim pune përfaqësuesit e Bankës Botërore nga Sektori i Energjisë dhe Ekstraktimeve, Michael Stanley, Brian Felske dhe Redon Begolli.

Në takim u bisedua për sfidat mjedisore dhe sociale në sektorin minerar të Kosovës. Me theks të veçantë u diskutua për ndërmarrjen Trepça, problemet mjedisore dhe nevoja për adresimin e tyre përmes legjislacionit dhe projekteve shkencore e profesionale. U potencua nevoja e bashkëpunimit dhe e përkrahjes nga Banka Botërore për adresimin dhe zgjidhjen e këtyre problemeve. z.Shala, së bashku me Drejtorin e Departamentit të Mjedisit të MMPH-së, z.Muhamet Malsiu i njoftuan përfaqësuesit e Bankës Botërore edhe për bazën ligjore, programore dhe strategjike në sektorin e mjedisit dhe ndërlidhjen e tyre me sektorin e minierave e posaçërisht për trajtimin dhe menaxhimin e mbetjeve minerare.