Nuk është koha, rrethanat dhe as mënyra e duhur për rritjen e çmimit të energjisë!

Kjo nuk duhet të ndodhë për shumë fakte dhe arsye, disa prej të cilave do të mundohem ti numëroj në këtë shkrim.

E para, tashmë po vërtetohet që në raport me krizën energjetike dhe me planifikimin e rritjes së çmimit të energjisë ende ka paqartësi, ka keqplanifikim dhe keqmenaxhim të situatës energjetike në vend.

E dyta, një fakt pozitiv që arsyeton kërkesën e mos rritjes së çmimeve është kthimi në punë i Bllokut B2 (zvogëlimi i importeve). Dhe kapacitetet prodhuese vendore aktualisht janë mbi 1000 MWh, e jo ashtu siç i pretendon Qeveria. Për më tepër lidhur me këtë konstatim mundë ti referoheni Raportimit të ZRRE-së.

E treta, qytetarët, shoqëria civile, bizneset, të gjithë akterët presin që Kuvendi i Kosovës ti thotë JO ngritjes së çmimeve, andaj nuk duhet ti zhgënjejmë ata në një situatë të tillë.

E dimë tashmë që, Qeveria e Kosovës domosdoshmërisht pret të ketë një arsyetim, çfarëdo qoft ai, për të dal nga kjo situatë dhe krizë.

Por po ashtu e dimë që Qeveria ka edhe një problem: Mungesën e ideve kreative për të gjetur zgjidhje dhe për të ofruar shpresë për të ardhmen.

Ajo ka dëshmuar dhe ka treguar që është e pa aftë për të udhëhequr paraprakisht me masa parandaluese (preventive) për të efituar krizën. Sipas logjikës së Qeverisë njëherë duhet të vijnë krizat, pastaj duhet të merren masat!

Këtë e ka dëshmuar në disa raste, sikurse ishin ato me pandeminë, me krizën energjetike dhe me inflacionin.

Sipas skenarëve të deritanishëm, për Qeverinë e Kosovës, është dashur që fillimisht të ndodhë një situatë krize, që pastaj të ndërmerren masat.

E dimë që Kryeministri ka Qeverinë, Kabinetin më të shkolluar, pushtetin absolut.

E dimë që edhe rregullatorët e pavarur i ka në menagjimin e tij, dhe po ashtu edhe ndërmarrjet publike.

E dimë gjithashtu që edhe asetet e pronat e AKP-së po kthehen te Qeveria.

Në rregull, pra!

I ka kërkuar, ja keni dhënë, i ka të gjitha.

Ju ka premtuar, i keni besuar.

Po sot ku jemi?

Ku jemi me premtimet që ka dhënë? Ku jemi me besimin që i keni dhënë? Askund! Politikisht pothuajse gjysmë të izoluar, me ekonomi të stopuar dhe në amulli të plotë.

Asnjë projekt kapital nuk e shihni duke u zhvilluar.

Asnjë lopatë inaugurimi nuk e shihni tash e disa muaj në Kosovë!

Asnjë projekt i ri, e as i vjetër, përveq disa skemave sociale nga programi i rimëkëmbjes.

Kur i shtojmë kësaj situatën e pandemisë, inflacionin e lartë, krizën energjetike, atëhere situata është edhe më e rëndë sa që e paraqet Qeveria.

E Qeveria dhe kryeministri në vend të na sillte rezultatet e punës, dinamikën, strategjinë e shumëpritur për energjinë, na e sjellin retorikën mbi 20 vjeçarin e kaluar.

Kryeministër, Ju jeni këtu për të ardhmen, për zhvillimin e këtij vendi.

Ju jeni këtu për të menagjuar situatat politike dhe ekonomike,  për të menagjuar krizën energjetike dhe pandeminë. Ju jeni këtu për të ulur inflacionin e jo për ta rritur atë.

Nëse Kryeministri dëshiron ta kalojë këtë krizë energjetike, po i japim disa ide nga Opozita:

• Të fillojë menjeherë me projekte konkrete në sektorin e energjisë duke evituar përsëritjen e gabimeve të vjetra eventuale;
• Të fillojë sa më shpejtë me investime kapitale në sektorin e energjisë;
• Të bashkëpunojë ngushtë me investitorë të jashtëm dhe të brendshëm, në sektorët energjetik të Kosovës.

Ja edhe disa propozime për  zgjidhje strategjike për rritjen e kapaciteteve prodhuese vendore energjetike:

• Të fillojë menjëherë planifikimin dhe revitalizimin e Termocentraleve A dhe B;
• Të fillojë menjëherë përgaditjen dhe ndërtimin e një termocentrali të ri,
• Zgjerimi e kapaciteteve tjera energjetike nga era; në Shalë të Bajgorës, në Llap, në Qyqavicë, në Budakovë, Golesh, etj..
• Të fillojë projektet e energjetike, me panele diellore, në KEK, në Kodrat e Goleshit, dhe shumë zona të tjera që ka potencial për prodhimin e energjisë nga dielli në sezona të caktuara;
• Të marrë vendimin pozitiv për projektin amerikan për gazin e lëngët Amerikan;
• Të zbatojë urgjentisht rezolutën e Kuvendit, dhe vendimin e Gjykatës Kushtetuese, për zgjidhjen e humbjeve të energjisë në pjesën veriore të Kosovës (kanë kërkuar 6 muaj afat, tani po bëhen 9 muaj dhe nuk ka asnjë lëvizje në zbatimin e këtyre obligimeve);
• Të bëjë liberalizimin e tregut të energjisë.
• Të mos e miratoj raportin e ZRRE-së, për tarifat e energjisë.

Për të vepruar i ka në dispozicion të gjitha resurset e këtij vendi. Veprimi duhet të jëtë i shpejtë, dhe i shoqëruar me një plan te detajuar.

Dr.sc. Ferat Shala, Deputet i Parlamantit të Kosovës