Sot, në mbledhjen e Komisionit për Ekonomi, Industri, Ndërmarrësi dhe Tregti, ka qenë e ftuar për raportim Ministren e Ministrisë për Ekonomi, Artane Rizvanolli, për temat e furnizimit të vendit me energji elektrike dhe për gjendjen dhe funksionimin e ndërmarrjeve publike.

14.12.2021- Në ekspozenë e saj raportuese, Ministrja foli për sfidat kryesore me të cilat po përballet Kosova, sfida të cilat lidhen me krizën energjetike të cilat, siç tha ajo, kanë ardhur si pasojë e rritjes së çmimeve të gazit në tregjet globale. Shqetësues është rreziku për mos furnizim të mjaftueshëm me energji elektrike dhe ngritja potenciale e çmimeve të saj, si rrjedhojë e një trendi global që e ka kapluar pothuajse gjithë botën, që nga sezona e verës. Me shumicë komisioni ka miratuar raportin me rekomandime për lexim të dytë për Projektligjin nr.08/L-018 për tregtinë me produkte të naftës dhe karburante të ripërtërishme, si dhe raportin me rekomandime për lexim të dytë për Projektligjin nr.08/L-021 për tregti me jashtë, duke proceduar kështu tutje për njërën nga seancat plenare të radhës.