Dy delegacionet nënvizuan lartë bashkëpunimin politik dhe teknik ndërmjet dy Qeverive dhe dhanë mbështetje të plotë politike për intensifikimin edhe më tutjeshëm të shkëmbimit të informacionit dhe përvojave.

Prishtinë, 29 Korrik2016, - Sot në Prishtinë, Zëvendës Ministri i MMPH-së z. Ferat Shala, Zëvendës Ministri i MIE-së z. Ramadan Ilazi, Zëvendës Ministri i MAPL-së z. Bajram Gecaj, pritën delegacionin e lartë nga Qeveria e Republikes së Maqedonisë, të udhëhequr nga z. Arber Ademi, Zëvendës Kryeministër përgjegjës për Integrim Evropian, znj. Shiret Elezi, Ministre e Vetëqeverisjes Lokale dhe z. Bashkim Ahmeti, Ministër i Mjedisit Jetësor dhe Planifikimit Hapësinor. Gjatë takimit delegacionet diskutuan ecurinë e agjendës Evropiane të dy vendeve respektive, si dhe bashkëpunimin e ndërsjelltë në fushën e legjislacionit të BE-së, zbatimit të MSA-së si dhe implementimit të fondeve të BE-së. Në veçanti, delegacionet disktutuan mbi potencialin e bashkëpunimit ndërmjet dy vendeve në kuadër të zbatimit të fondeve ndërkufitare të BE-së apo Cross Border Cooperation (CBC).