Ish-drejtori i Trepçës, Ferat Shala nga shtatori do të jetë në krye të Agjencisë Kosovare të Privatizimit.

Kjo duket të jetë punë e kryer për Qeverinë e Kosovës, e cila tashmë e ka bërë gati emrin e tij ta dorëzojë në fund të muajit në Kuvendin e Kosovës, kur edhe mbahet mbledhja e parë pasi deputetët të kthehen nga pushimet. Për këtë arsye, zyrtarë të lartë të ekzekutivit i kanë thënë Gazetës Express se Shala ka dhënë edhe dorëheqje nga pozita e menaxherit të kombinatit metalurgjik Trepça. “Ferat Shala është kandidati i vetëm që ka mbetur në kombinim për ta marrë detyrën e drejtorit të bordit të AKP-së”, thekson ky burim. Arsyeja se ai po largohej nga kjo ndërmarrje për t’iu përkushtuar studimeve akademike thonë se nuk është e vërtetë pasi që vendimin për ta lënë postin e menaxherit të Trepçës e ka marrë pasi ishte siguruar se do ti besohej pozita e shefit të AKP-së. Gazeta Express ka tentuar të kontaktojë me Ferat Shalën për të marrë komentet e tij lidhur me këto pohime, por kontakti ka qenë i pamundur. Ky lajm tanimë ka një kohë të gjatë që po qarkullon edhe në mesin e zyrtarëve të AKP-së, të cilët në njëfarë forme po përgatiten për pritjen e drejtorit të ri që ka shërbyer më parë si anëtar i SHIK-ut, në pozitën e drejtorit kundër-inteligjencës. “Është e sigurt se Shala do të jetë Shef i AKP-së, pasi që kundërkandidatët e tij nuk e kanë mbështetjen politike që ka ai”, ka thënë një anëtar i Bordit të AKP-së në kushte anonimiteti për Express.